ரி-20 உலகக்கிண்ணத் தொடருக்கான எதிர்பார்ப்பு மிக்க இலங்கை கிரிக்கெட் அணி விபரம் அறிவிக்கப்பட்டுள்ளது.
இந்த அணியில் அண்மையில் ஆசியக் கிண்ணத்தொடரில் வாகை சூடிய இலங்கை அணியில் இடம்பெற்றிருந்த அனைத்து வீரர்களும் இடம்பெற்றுள்ளனர்.
எனினும், ஆசியக் கிண்ணத் தொடரில் ஒரிரு போட்டிகளில் விளையாடிய வேகப்பந்து வீச்சாளர் அசித்த பெணார்டோ வெளியேற்றப்பட்டுள்ளார். அவருக்கு பதிலாக உபாதைக் காரணமாக ஓய்வில் இருந்த பினுர பெனார்டோ மேலதிக வீரர்களில் ஒருவராக உள்வாங்கப்பட்டுள்ளார்.
அத்துடன், உலகக்கிண்ண அணியில் இடம்பிடிப்பார் என பெரிதும் எதிர்பார்க்கப்பட்ட இளம் வீரராக துனித் வெல்லாலகே அணியில் இடம்பெறவில்லை.
மேலும், துடுப்பாட்ட வீரரான அவிஷ்க பெனார்டோ உபாதையில் இருந்து இன்னமும் முழுமையாக மீளாத காரணத்தால் அவரும் அணியில் இடம்பெறவில்லை.
வேகப்பந்து வீச்சாளர்களான துஸ்மந்த சமீர மற்றும் லஹிரு குமார ஆகியோர் உடற்தகுதி பொறுத்து அணியில் இடம்பிடிப்பார்கள்.
தசுன் சானக தலைமையிலான அணியில், தனுஷ்க குணதிலக்க, பெத்தும் நிஸங்க, குசல் மெண்டிஸ், சரித் அசலங்க, பானுக ராஜபக்ஷ, தனஞ்சய டி சில்வா, வனிந்து ஹசரங்க, மகேஷ் தீக்ஷன, ஜெப்ரி வெண்டர்சே, சமிக்க கருணாரத்ன, துஸ்மந்த சமீர, லஹிரு குமார, தில்ஷான் மதுஷங்க, பிரமோத் மதுஷான் ஆகியோர் இடம்பெற்றுள்ளனர்.
மேலதிக வீரர்களாக, அஷேன் பண்டார, பிரவீன் ஜெயவிக்ரம, தினேஷ் சந்திமால், பினுர பெணார்டோ, நுவனிந்து பெனார்டோ ஆகியோர் பெயரிடப்பட்டுள்ளனர்.
Editor
