உறவினரான தனது பாட்டியின் வீட்டிலிருந்து சுமார் 3 இலட்சம் ரூபா பெறுமதியான தங்க நகைகள் உள்ளிட்ட பொருட்களைத் திருடியதாகக் கூறப்படும் யுவதி ஒருவரை கைது செய்துள்ளதாக வென்னப்புவ பொலிஸார் தெரிவித்தனர்.
லுணுவில, சிறிகம்பள பிரதேசத்தைச் சேர்ந்த 24 வயதுடைய யுவதியே இவ்வாறு நேற்று முன்தினம் கைது செய்யப்பட்டுள்ளார். கைதான யுவதி தனது பாட்டியின் வீட்டிலிருந்து இரண்டு பவுண் எடையுடைய தங்கச் சங்கிலி, பென்டன், கைப்பேசி, கைக்கடிகாரம் போன்றவற்றைத் திருடிச் சென்றுள்ளமை தொடர்பில் பொலிஸில் முறைப்பாடு செய்யப்பட்டுள்ளது.
இந்த முறைப்பாடு தொடர்பில் விசாரணைகளை மேற்கொண்ட பொலிஸார் யுவதியைக் கைது செய்துள்ளனர். இந்நிலையில் தனக்கும், தனது கணவருக்கும் ஹெரோயின் வாங்குவதற்காக பணத்தைப் பெற்றுக் கொள்ளும் நோக்கிலேயே இவ்வாறு திருட்டில் ஈடுபட்டுள்ளதாக அப்பெண் பொலிஸாரிடம் அவர் தெரிவித்துள்ளார்.
Editor
